काठमाडौँ, २९ असार ।
केही दिनदेखि सञ्चार माध्यममा सामान्य प्रशासन तथा संघीय मामिला मन्त्री राजकुमार गुप्तालाई लक्षित गर्दै आएको चरित्र हत्या प्रयासप्रति मन्त्री गुप्ताले गम्भीर आपत्ति जनाएका छन्।
सरुवा, नियुक्ति तथा घुस बार्गेनिङमा संलग्न भएको आरोपसहित सार्वजनिक भइरहेका समाचारहरू प्रायोजित, निराधार र बेबुनियाद भएको मन्त्री गुप्ताको भनाइ छ। “माथि आएका यी आरोपहरू मेरो प्रतिष्ठा र निष्ठामाथिको हमला हो,” मन्त्री गुप्ताले स्पष्ट पारेका छन्।
उनले मिडिया र पत्रकारहरूलाई प्रमाणसहितको अनुसन्धान गर्न आह्वान गर्दै निम्न ५ बुँदामा प्रश्न उठाएका छन्—
मन्त्री गुप्ताले उठाएका मुख्य प्रश्नहरूः
१. कर्मचारी सरुवा गर्न दबाव दिने बिचौलिया वा व्यक्ति को हुन् ?
२. सार्वजनिक गरिएको नोटसहितको टेबल कहाँको हो ? जुन टेबल देखाइएको छ, त्यो कहिल्यै मेरो कार्यकक्षमा थिएन।
३. नोटको श्रोत, मालिक र प्रयोगकर्ताको बारेमा प्रमाण के छ ?
भनिएको छ कि अख्तियारलाई नोट बुझाइएको छ, तर ती नोट कहाँबाट आए ? कसले दियो ? अहिले कुन अवस्थामा छ ?
४. भूमि आयोगमा नियुक्त व्यक्तिबारे म अनभिज्ञ छु। ती कर्मचारी नियुक्त भए या भएनन् ? मलाई कुनै जानकारी छैन।
५. सामाजिक सञ्जालमा प्रयोग गरिएको आवाज एआई प्रविधिबाट निकालिएको हो। त्यो मेरो वास्तविक आवाज हो भन्ने पुष्टि कसले गर्छ ?
पत्रकारिता प्रतिको सम्मान
मन्त्री गुप्ताले आफू सधैँ लोकतन्त्रको आधारस्तम्भ स्वतन्त्र प्रेसको सम्मान गर्ने पक्षमा रहेको दोहोर्‍याएका छन्। तर, मिडिया नै नियोजित खबर प्रवाहमा लागेमा त्यसले जनताको विश्वास गुम्ने खतरा बढ्ने चेतावनी समेत दिएका छन्।
“अब प्रमाण खोजौं, तथ्यसँग ठोस पत्रकारिता गरौं। सत्य, न्याय र निष्ठाको पक्षमा म सधैं उभिन्छु,” मन्त्री गुप्ताको भनाइ छ।
सरकारको महत्वपूर्ण जिम्मेवारी सम्हालिरहेका मन्त्री राजकुमार गुप्ताविरुद्ध आएका यस्ता निराधार आरोपमाथि अब निष्पक्ष अनुसन्धान र पत्रकारिताको इमानदार हस्तक्षेप आवश्यक देखिएको छ।